2011年2月15日

「山邊學院」

尋日睇恆管牆,見到筆友轉載穆巴拉克落台的消息,若然筆友以為恆管會好似埃及咁,就真係過分樂觀。穆巴拉克雖然獨裁,斷估唔敢改左阿拉伯埃及共和國(جمهوريّة مصرالعربيّة‎)做穆巴拉克共和國。但話說有所山邊學校,由於領導人做左夜郎好多年,做山寨王博士做得悶悶地,見間學校個名同自己個名有D字母相似,於是就當學校係自己王國咁,就算做唔到Chairman Mao,都起碼似番個Kim Jong-il、Saddam Hussein咁,於是「山邊學院」就咁成立。

但咁大個山頭一個人管唔晒,於是就仿效當年紂王咁整個「酒池肉林」,明明已經有個封塵私家泳池,重要籌集資金,起多個暖水池,俾自己享受享受。佢又驚自己個山寨唔夠威,所以打算請班教授番來,起碼整好個門面。但佢自己有幾多料,自己心裡有數,平時衰剩把口,實則驚到死。為怕王位不保,於是採用特務管治,當你班「教授」係「怪獸」,特登為佢地整間有窗的精神病院房,比你班友坐,等佢日日可以監察住。之後又學文化大革命著解放裝,嚴格規管衣著,總之衣不稱心(當然係山寨王的心)都大刑伺候。佢又仿效清代「門戶開放政策」,即所謂「Open Door Policy」,怕班怪獸逃獄,一去無回頭。於是,古人夜不閉戶遺風,終於係「山邊學院」重現,重成為學界之光。

不過,一條友始終管唔到咁大個山寨,於是佢就成立左個比FBI, KGB, MI6, RGB更神祕的組織:SMT,去管理個山寨。SMT開過乜會,講過乜野,外人一切唔知。山寨臣民只可以好似信耶穌咁:不要問,只要信。但據講SMT呢個神祕組織,除左獨裁邪教山寨王外,重有兩個要員:一個叫「茶餐廳」,一個叫「小狗阿旺」, 佢地日日係唔同範疇監察臣民一舉一動,以防犯上作亂。據講今年為左集中火力打「怪獸」,於是就挑選左兩個「風紀」,看住班原居民,一個叫「America Ferrera」,一個叫「鞋油猛點頭」 。當然呢班親信,個個為討山寨王歡心,都剩係識為虎作娼。總之,係山寨裡面,只有壓逼、威權、封閉、一言堂,完全無自由、權利、信任……呢D普世核心價值。

最後結局如何,借陳雲先生文章,俾大家參考:

「只要有絲毫的和平改良社會的機會,也不應放棄。總體爆發的暴亂革命,史上沒有多少個政治家有道德操守和通透智慧去駕馭。當然,用來消滅邪惡霸權,以惡止惡,革命很有效。然而,革命的功用,所謂弔民伐罪,也僅止於弔民伐罪而已。要開太平之世,靠的仍是溫溫吞吞的理性商量,跌跌撞撞的實務改善。突破困局,建立樂土,需要智慧、需要韌力,更需要快樂平靜的心境。至於斬妖除魔,道心不淨者,只是消前生孽障、也是結今世孽緣,在惡之中輪迴,非成佛解脫之道也。」

From: HSMD

4 則留言:

  1. SMT都有「正義人」在, 只是孤掌難鳴

    回覆刪除
  2. 此留言已被作者移除。

    回覆刪除
  3. 正唔正義我就唔知啦,歌仔都有唱"難為正邪定分界"...我淨係知道做得管理,對人信任尊重,有大學遠見,獨立思考,理性思維係起碼的要求.

    回覆刪除

注意:只有此網誌的成員可以留言。