2011年2月20日

紅朝風暴:記山吹佚事

無意中發現呢個俾人一吐烏氣的園地,口痕痕又想share一吓自己的感想。用穆巴拉克嚟形容喺山寨裡面吹水唔抹嘴的山吹哥,未免太睇唔起佢啦,因為佢的做事作風,係直接師承比埃及佬有過之無不及、專制手段登峰造極嘅大國紅朝架!由佢日常行為舉止,到平時對待臣民的方法,相信唔少人都會見到紅朝影子。啱啱紅朝係CPI度做過手腳,搞到望落去好似跌咗,呢d做嘢方法,可能大家都似曾相識。

話說間山寨學校唔知有個咩課程,一級榮譽的畢業生竟然可以有百分之廿幾,山吹哥就得意洋洋認叻話教育質素高,自我感覺良好,可能做專制領導得唔到臣民讚賞,唯有較一較個標準,出d靚數字自我安慰一下,唔少客仔係「次溫度課程」的鳳凰,去到「溫度課程」淪為山雞,其實都係同一道理。紅朝製造數字搞到「雞的皮」年年唔係九就係十,自稱崛起,山吹哥果然喺紅朝度學到嘢呀!咁又係,大家都咁迷信數字,諗住將d數字搓圓按扁,就可以魚目混珠!

紅朝領導愛面子,呢個全世界都知,其實山吹哥亦係同好。唔知點解佢有鋪影相癮,年年都要搵日影幾廿張相,次次埋位都總係小心翼翼,數下自己係咪最中心果個,可能坐低時幻想緊自己係宇宙中心,所有星體都圍住佢轉,自我中心的程度十足港孩。仲有,幾年前佢唔知點樣黐到個傳火棒的面子工程嚟做,要d客仔圍喺馬路邊睇住佢,浪費曬d時間,但係佢自己就high過啪丸。學「廿去一」才子陶先生話齋:強國人小農基因、死要面、形式化、思想膚淺(林語堂婉言單純),真係無講錯。

其實可能大家聽埋聽埋,都知道山吹哥滿口教育理想,唔少客仔聽佢sell,都聽到如痴如醉,最後做到幾多呢?心照啦,可能啱啱調轉添,呢d就叫「講就天下無敵,做就……」。呢樣嘢,又係好學唔學學紅朝,人地講到堅持馬克思主義,而家股樓都炒到含含聲,人人見錢開眼功利到不得了,當初講嘅理想,可能跌左落茅坑。山吹哥就係將人地果套「講做相反」嘅思維搬去「攪」(注意唔係「搞」)教育架啦!

山吹哥用咩方法監控維穩,呢個唔駛我多講啦,話咩要河蟹,以為唔俾人傳電郵,壓制吓唔同嘅意見,就即刻個個三呼萬歲遵旨,掩耳盜鈴,其實色厲內荏,咁驚不如學人裝綠壩算啦。不過講返轉頭,其實佢又唔係無話你知佢會咁管臣民嘅,如果唔係個山寨駛乜叫「管你」吖?原因亦一早講咗啦,佢「身痕」嘛,無計啦,日日吹水把口都累架嘛,把口抖的時候,咪管吓你睇你學完做臣民未囉。

話時話,唔知大家有無印象有次有個藍營既人嚟演講,中介單位叫「奴瘋呀罪」,聽聞呢個組織係同紅朝駐港辦事處有聯繫,即係欽差衙門d外圍組織,唔怪得山吹哥學紅朝嘢學得咁足啦。最後想送幾句唐司長金句俾山吹哥,希望佢唔好「關埋門做皇帝」,唔好「剛愎自用」,否則……

From: Swiss Guard

沒有留言:

發佈留言

注意:只有此網誌的成員可以留言。