2011年3月18日

恒管論壇

學生會主席許樂怡同學:「...學生會係代表學生,早前學生會已經做咗一份問卷,正正呢度嘅數據係顯示出,個個同學,我哋覺得果九宗罪,其中大家最有認同,或者係最同意嘅指控,頭三名,正正係話緊學校係中學化...」



人文學院院長陸潤棠教授:「...我睇見大家同學都準備咗好多資料,準備工夫做得好好。我覺得我今日嚟嘅目的,係想聽聽大家同學嘅意見先...不過我肯定講一句,傳統係要變嘅,好嘅傳統可以留低...我咁樣講始終係唔會得罪任何人...」



翻譯學院院長方梓勳教授:「...希望校方可以將尊重同埋信任,將佢推廣開去,我覺得每一個大學教授,每一個大學嘅老師,未必一定係教授,都有佢嘅才能,都有佢自己獨特之處嘅,都應該受到各人包括校方、包括學生嘅尊重同埋信任,咁樣佢先至可以發揮佢自己嘅才能,咁樣佢先至可以同心合力咁樣搞好呢個...呢個...(掌聲打斷)...同埋呢,尊重信任,對同學嚟講亦都非常之重要,作為一個大學生同中學生有乜唔同呢?就係話你哋會尊重自己、你哋會信任自己,同埋你哋亦都好樂意去接受人哋尊重你、好樂意去接受人哋信任你,咁至得,我哋就係要培養D咁嘅學生,咁呢個就係大學教學嘅真諦,呢個就係大學教育同中學教育嘅不同之處...」



協理副校長黃寶財教授:「...我同大家講,Wi-Fi、i-Pad,我舊年10月返工,我11月幫佢做晒tender,校長批晒,但係果D嘢上到校董會,擱咗响上面,果D嘢其實我都冇辦法...」「eer...嗱...啫係...第一...eer...下次呢,我講完你先好插咀...」



供應鏈管理一年級同學:「...我覺得,我哋嘅校長誠信都有問題啦!咁我哋一染髮嘅時候,呢個問題嘅回應就話,冇明文規定啦,但係我哋係有學生入學果時影學生相,果啲staff講...你有染髮喎,唔俾影學生相,一定要染返黑先俾影學生相,咁即是你已經做咗啦,咁點解校長,要喺人哋面前要否認呢?」



工商管理學院院長蘇偉文教授:「...我哋要rank高嘅話,將所有嘅資源dum落去research度,我哋可以唔理學生嘅話,如果我做得出嘅話,我唔喺呢度,我做得出呢樣嘢嘅話,我會繼續留喺中文大學,因為我睇唔過眼,我要將最寶貴嘅資源,係浪費咗喺虛榮身上,並唔係活生生地俾各位有血有肉嘅年輕人...」



學生會幹事刁耀軍同學:「...學校應該要將好多嘅(嘢),其實應該擺出嚟俾大家公開討論,俾大家知道。就好似Professor Wong(黃寶財教授)咁,你而家可能係學校嘅代言人、或者係校長嘅代言人啦...佢話D咁嘅嘢,你點可以咁快做...Professor Wong話之嘛,我冇話...咁就死無對證,係咪先?」



工商管理學系會副主席林惠業同學:「...我肯定今次嘅恒管論壇,係一個非常成功嘅一次,因為好破天荒地有學生會嘅合作,促成咗學生同高層之間嘅對話...咁其實,我哋今日坐得低呢度嘅呢,咁就基本上都有共同點嘅...就係對學校有共同嘅期望,同埋共同嘅關愛,但係問題就係話,唔知點樣去搵一個渠道去到抒發你想講嘅嘢、你想做嘅嘢,所以呢,平台就正係提供到一個方便俾大家,所以期望下次再搞嘅時候,在座各位可以呼籲多D同學參與,呢個正係作為一個大學應該要有嘅文化、一個自由討論嘅空間,我哋提供咗,問題就係你哋願唔願意(參與)落去呢?」

沒有留言:

發佈留言

注意:只有此網誌的成員可以留言。