2011年6月23日

超失常公器再私用 樣該猥水鬼升城隍

自春夏之交嘅一輪風波後,超失常權力被架空。佢自把自為嘅作風,只能橫行以前嘅風光地。

話說每年山寨A工廠都會提名兩位A級教學人員俾特區朝廷嘅傑出教師獎。而得獎名單更會大肆宣揚,成張王榜咁貼係四樓。但到今日,大家又知唔知道今年邊位中獎?其實月前,恆管牆已提醒大家,為各位介紹山寨A工廠嘅優秀教師。估不到超失常原來都係恆管牆忠實讀者。今次仲從善如流,將珍貴嘅獎項提名,送俾佢御用弄臣,即言行甚有個性嘅「抄大博士」:「樣該猥」。

根據過往慣例,山寨A工廠優秀教師提名,都係根據顧客調查分數做決定。姑勿論呢個標準係咪公道,但起碼推行左一段時間。但今年唔知點解,「抄大博士」憑佢毫不優秀嘅顧客調查分數,竟然脫穎而出,成為可能係有史以來最低分嘅得獎人。背後理據真係好似老夫子漫畫咁「耐人尋味」。

眾所周知,優秀教師係表揚教師努力成果。一定唔應該係超失常自把自為、私相授受嘅玩具。山寨A工廠既然咁重視顧客調查,經常認為高評分員工等同傑出員工。今年點解唔索性公開「抄大博士」所得分數,既可以俾大家釋除心中疑慮,又可以好似保險公司咁,公布同事業績,俾其他員工做目標,當模範咁學習。

當然,以「抄大博士」嘅工作表現,要成為顧客調查分數榜首,當然無乜可能性。但究竟佢憑乜獲得提名?就真係值得大家估下。如果論工作表現,「抄大博士」過往任教的業績可謂麻麻,學生係朝廷科舉嘅成績都不過中規中矩,無乜標青。( 值得一提,「抄大博士」業績雖然一般,但就經常係學生面前,誇口自己成績超班,明明成班一半人C、D,就話得幾個。明明成日叫人補習,博贏獎金,點知轉頭又周圍同人講補習無用。佢呢種「打開眼講大話」嘅必殺技,話人無用卻留為己用,就真係不負「傑出」稱號 )。至於論產品開發,雖然係新課程審批,佢確係略盡棉力。但明眼人都知,山寨A工廠所以成功初步轉型,全靠班教授背後發功,運籌帷幄,淨係靠佢同山吹、茶餐廳、十千歲呢班自我吹噓,奉承上級嘅友仔,就真係難過登天。

當然最得人驚嘅係,「抄大博士」過往呢年犯錯屢屢。先有貪方便,抄人野,連佢平時最不屑嘅補習社都唔放過。呢件事不但知道呢個人誠信破產,更連累山寨A工廠被人告,登報唱衰,名譽掃地。之後,「抄大博士」用人唯親,將寶貴的internship過戶俾自己友,收買學生,私相授受。咁嘅為人、咁嘅操守,竟然成為傑出教師?唔通超失常真係失常到想班年青人,揾佢做榜樣?教曉佢地原來只要識刷鞋,就算誠信破產、接連犯錯、對機構全無貢獻嘅員工,都可以成才。

超失常將獎項提名,隨便按佢個人喜好、親疏,私相授受。呢種做法不單係管理嘅災難,更完全違背左教育工作者嘅應有道德人格。而呢個原本為表揚嘅獎項,都因為超失常,同埋「抄大博士」,淪為對教育、對工作真正付出心血嘅人嘅最大侮辱。而呢單野就絕對值得山寨A工廠上下仝人注視。

沒有留言:

發佈留言

注意:只有此網誌的成員可以留言。