2011年6月18日

山吹唔識字?

山邊學院嘅學生, 鬧爆得最勁嘅就係中學化嘅問題, 先排仲有山邊教授响生果報發炮, 話大學教授由中學老師評核, 做法好唔妥當. 結果校董會推出一個改革方案, 增設provost全權負責學術, 管理, 財務等工作, 而山邊校長就負責擴建校舍及籌募資金兩大重任, 呢個改革方案, 校董會秘書甚至煞有介事咁, 用email向全校師生發放, 白紙黑字, 中英對照, 童叟無欺, 只要唔係文盲, 都唔會睇唔明也.

偏偏山邊校長, 就真係好似唔識字咁, 完全當校董會方案冇到, 人前人後都話範範都仲係佢睇, 如果真係咁, 校董會嘅改革方案大龍鳳, 搞嚟做乜? 有一次provost搞個答問會, 有山邊教授問校方有乜籌款大計, 點知山邊校長話, 呢啲嘢以前都係校監做嘅, 言下之意, 即係話呢啲嘢, 唔關佢事, 唔該校監妳做埋佢果份! 咁都得? 試問朱經武, 徐立之...... 邊個校長唔使籌款?

老實講, 呢吓嘢真係教壞細路. 試諗吓, 如果老師俾功課學生做, 仲驚死佢聽唔清楚, 幫佢寫埋家課手冊, 白紙黑字, 中英對照, 點知個學生話: 呢啲嘢以前都係老師幫我做開, 我接受唔到咯, 我係唔會做咯...... 咁即係點? 四個字, 紅筆寫嘅: "欠交功課"! 大佬呀, 以前還以前, 而家還而家, 就算以前個老師, 真係幫你做埋啲功課 (聽講弊校top-up嘅fyp, 確實如此), 都唔代表今日, 可以當老師講嘅嘢冇到啦係嘛?

至於擴建校舍, 交由山邊校長做, 都係好有問題, 好似佢要將啲舊building嘅舊班房變做劏房, 俾啲教授做office, 劏幾刀, 點劏法, 完全冇咨詢過使用者, 你地班教授咪使旨意會喺新校舍有office, 總之我俾乜你你就要乜, 咪咁多聲氣 咪咁多gee-gut, 鬼叫你班友仔得罪本寨主! 房就劏得越多越好, 人就塞多一個得一個, 完全係無限延伸山吹刻薄精神, 一諗起劏房, 就諗起馬頭圍道唐樓, 咪話唔驚! 宿舍咁多空置, 據講仲有宿舍單位租咗俾校外人住, 何不變埋office, 起碼就算真係火燭, 班教授都唔使一鑊熟啦!

關於評核問題, 山邊校長亦係一貫地出爾反爾, 先排曾經公開講過, 話以後由大學教授組成嘅academic leader, 將會相等於一般大學嘅department chairperson, 而由中學老師組成嘅department head, 將會做administrative head, 只管行政工作. 如果係咁, 所有嘅老師, 唔理係teaching track, 即或係research track, 都應該係由department chairperson評核, 咁亦都係大學嘅一般做法.

理由好單單, 因為無論係teaching, 抑或係research嘅表現, 都係屬於academic嘅範疇, 個場當然係應該由academic leader睇, 既然appraisal係同administration全無關係, 當然冇理由再交由administrative head做學術評核, 而山邊校長仍然堅持要由administrative head做評核, 喺道理上係完全站唔住腳, 唯一可以諗到嘅"好處", 係可以延續山邊校長對中學老師嘅無形控制, 令恒管中學化借屍還魂. 更重要嘅係, 既然係屬於academic嘅事, 點解唔係由provost決定, 而係任由山邊校長說三道四?

投稿:百足之蟲

沒有留言:

發佈留言

注意:只有此網誌的成員可以留言。