2012年10月14日

吹雞新鮮事

霸住茅坑唔痾屎

 
話說茶餐廳離開「山邊高級食府」之後,吹雞仲留番間大「痾肥屎」,俾佢個愛將,日日等住茶餐廳幾時番黎,重温以前晏晝孖公仔去佢哋最鐘意嘅客棧飯堂,一齊出計仔對付果班唔識教野,但係evaluation 5.0以上,又成日唔聽話嘅高級食府大廚。吹雞一定想最好番番去舊時人人要打咭,個個坐係「痾肥屎」隨時應佢召嘅「大排檔」最威水日子。果陣時,「大排檔」之內,除咗茶餐廳,仲有幾件prefect,成日巡房仲夾埋偷窺,真係笑死人。之不過聽聞茶餐廳去到「不舉食府」,唔知乜野原因,冇幾奈就走人,睇黎轉枱之後又想有樣學樣搞番攤高級大排檔,但係人哋似乎都係想認真搞高級食府,如果唔升呢,冇大格局view就係冇,扮都冇用架!真相就要學吓水果日報,派狗仔去追查吓至得。
 

會唔會抵觸平機法

 
講到有人霸住個茅坑唔痾屎,有啲野就真係大家可能唔知。「山邊高級食府」除咗茶餐廳之外,仲有個隱形「一片金」,掛正名號搞機,但係佢好似唔止唔駛教野,仲唔知幾時番工幾時放工,就算有番工,以佢依家嘅 post, 有乜野理由仲霸住個大「痾肥屎」,其實「山邊高級食府」有幾個大廚仲坐緊細梗房。更加離奇嘅係邊個請一片金,有冇經過正式人事手續;有冇公開招聘?如果冇經過正式人事手續,係咪唔合規定?如果冇公開招聘,會唔會抵觸平機法?唔通吹雞仲可以玩隻手遮天?遲啲會唔會連茶餐廳都番埋黎架?唔該吹雞解吓畫。唔該各位食府股東深入了解吓!
 

蝕本都要留住心腹

 
仲有,人人都知一片金黎「山邊高級食府」嘅時候,佢舊時做開間舖嘅舊伙記,都戥間舖開心,因為佢係同行眼裏面,實在唔知有啲乜野作為。而家「山邊高級食府」嘅機房設備,只要有個有經驗嘅伙頭,加上適當人手,就搞得掂。請問佢咁多錢為「山邊高級食府」做咗啲乜野呢?吹雞成日話「山邊高級食府」蝕本,點解仲要駛寃枉錢係毫冇貢獻嘅一片金身上?
 

吹雞嘅格局始終冇變

 
今個學期「山邊高級食府」幾個地盤開工,少咗好多車位。但係吹雞又係度霸住個茅坑唔痾屎,一條友霸三個車位,唔俾其他人用。「山邊高級食府」CEO吹雞嘅格局始終冇變,大事冇辦法理,因為冇大見識;小事唔識理,因為私心太重,唔識顧全大局。睇黎冇大格局view就係冇,連扮都冇本事扮!
 

係咪想整沉海上食府呢

 

最近有報紙報導吹雞話「山邊高級食府」招收學徒人數「嚴重不足」,咁嘅錯誤消息,先至係嚴重影響「山邊高級食府」商譽!有人問吹雞佢有冇講過,佢話冇,但係吹雞嘅誠信,人人都知,就算佢有講過,事後發覺講錯野,一定唔會承認。就算今次佢真係冇講過,以佢跌落地要拿番咋沙嘅個性,點都要出黎澄清吓掛?冇出黎澄清,唔通佢心虛,真係講過?乜野居心啊!係咪想搞一拍兩散,將高級食府由山邊移到海上,然後整沉佢呢?

 

投稿人:路邊社記者

1 則留言:

  1. 其實吹雞霸咁多車位係有原因既,唔係因為有三個蘿柚所以要坐三個屎塔,而係方便佢個仔泊車!吹雞個仔直頭當食府係自己會所,有時星期日會叫看更開禮堂,set埋網俾佢同朋友打羽毛球,都不知幾happy!

    回覆刪除

注意:只有此網誌的成員可以留言。